Beata nobis gaudia Anni reduxit orbita, Cum Spiritus Paraclitus Effulsit in discipulos.

Ignis vibrante lumine, Linguæ figuram detulit, Verbis ut essent proflui, Et charitate fervidi.

Linguis loquuntur omnium : Turbæ pavent Gentilium ; Musto madere deputant Quos Spiritus repleverat.

Patrata sunt hæc mystice, Paschæ peracto tempore, Pleno dierum numero Quo lege fit remissio.

Te nunc, Deus piissime, Vultu precamur cernuo, Illapsa nobis cœlitus Largire dona Spiritus.

Dudum sacrata pectora Tua replesti gratia, Dimitte nostra crimina, Et da quieta tempora.

Gloria Patri Domino, Natoque qui a mortuis Surrexit, ac Paraclito, In sæculorum sæcula !