Christe qui lux es et dies, Noctis ténebras détegis, Lucísque lumen créderis, Lumen beátum prædicans.

Precámur, sancte Dómine, Defénde nos in hac nocte : Sit nobis in te réquies, Quiétam noctem tríbue.

Ne gravis somnus írruat, Nec hostis nos surrípiat : Nec caro illi conséntiens Nos tibi reos státuat.

Oculi somnum cápiant, Cor ad te semper vígilet : Déxtera tua prótegat Fámulos qui te díligunt.

Defénsor noster, áspice, Insidiántes réprime : Gubérna tuos fámulos Quos sánguine mercátus es.

Meménto nostri, Dómine, In gravi isto córpore : Qui es defénsor ánimæ, Adesto nobis, Dómine.

Deo Patri sit glória, Ejusque soli Fílio, Cum Spirítu Paráclito, Et nunc et in perpétuum. Amen.