Jam Christe, sol justitiæ, Mentis diescant tenebræ, Virtutum ut lux redeat, Terris diem cum reparas.

Dans tempus acceptabile, Et pœnitens cor tribue, Convertat ut benignitas Quos longa suffert pietas ;

Quiddamque pœnitentiæ Da ferre, quamvis gravium, Majore tuo munere, Quo demptio fit criminum,

Dies venit, dies tua, In qua reflorent omnia : Lætemur in hac ad tuam Per hanc reducti gratiam.

Te rerum universitas, Clemens adoret Trinitas : Et nos novi per veniam Novum canamus canticum.