Iste confessor Domini sacratus (Nouvelle traduction)

Anonyme,

Iste confessor Domini sacratus, Festa plebs cujus celebrat per orbem, Hodie lætus meruit secreta Scandere cœli :

Qui pius, prudens, humilis, pudicus, Sobrius, castus fuit, et quietus, Vita dum præsens vegetavit ejus Corporis artus :

Ad sacrum cujus tumulum frequenter Membra languentum modo sanitati, Quolibet morbo fuerint gravata, Restituuntur :

Unde nunc noster chorus, in honorem Ipsius, hymnum canit hunc libenter, Ut piis ejus meritis juvemur Omne per ævum.

Sit salus illi, decus, atque virtus, Qui supra cœli residens cacumen, Totius mundi machinam gubernat, Trinus et unus.