Jam Christus astra ascenderat (Nouvelle traduction)

Ambroise de Milan,

Jam Christus astra ascenderat Reversus unde venerat, Promissum Patris munere Sanctum daturus Spiritum.

Solemnis urgebat dies, Quo mystico septemplici Orbis volutus septies Signat beata tempora ;

Dum hora cunctis tertia Repente mundis intonat, Orantibus apostolis Deum venisse nuntiat.

De Patris ergo lumine Decorus ignis almus est, Qui fida Christi pectora Calore verbi compleat.

Impleta gaudent viscera, Fecunda sancto Spiritu, Voces diversas intonant, Fantur Dei magnalia.

Ex omni gente cogniti Græcis, Latinis, Barbaris, Cunctisque admirantibus, Linguis loquuntur omnium,

Judæa tunc incredula, Vesana torvo spiritu, Ructare musti crapulam Alumnos Christi concrepat.

Sed signis et virtutibus Occurrit, et docet Petrus, Falsa profari perfidos Joele teste comprobans.

Gloria Patri Domino, Natoque qui a mortuis Surrexit, ac Paraclito, In sæculorum sæcula !