Hucbald de Saint-Amand,

O quam glorifica luce coruscas, Stirpis Davidicæ regia proles, Sublimis residens virgo Maria, Supra cæligenas ætheris omnes !

Tu cum virgineo, mater, honore Angelorum domino pectoris aulam Sacris visceribus casta parasti ; Natus hinc Deus est corpore Christus.

Quem cunctus venerans orbis adorat, Cui nunc rite genu flectitur omne, A quo nos petimus te veniente Abiectis tenebris gaudia lucis.

Hoc largire, pater luminis omnis, Natum per proprium flamine sancto, Qui tecum nitida vivit in æthra Regnans et moderans sæcula cuncta.